Kryeministri Edi Rama siguroi se mazhoranca që ai drejton është e vendosur për një drejtësi të pavarur, ndërsa ngriti shqetësimin për atë që e cilësoi si raste arbitrariteti në dhënien e masave të sigurisë.

“Ne duam një drejtësi të pavarur. Fatmirësisht e kemi sot aq të pavarur, sa që një prokuror në një rreth lëshon 33 masa arresti dhe harron të arrestojë vetëm veten e vet, sepse përveç personit të prokurorit që ka lëshuar 33 masa arresti, nuk ka mbetur askush pa u arrestuar pa filluar gjyqi akoma”, u shpreh Rama.

Ai theksoi se shqetësimet lidhur me nivelin e paraburgimeve nuk janë vetëm qëndrime politike, por sipas tij pasqyrohen edhe në raportet ndërkombëtare.

Kryeministri përmendi vlerësimet e Këshilli i Europës dhe të Komiteti për Parandalimin e Torturës, duke theksuar se Shqipëria renditet ndër vendet me përqindje të lartë të paraburgimeve pa gjyq.

“Dhe fatmirësisht nuk jam unë që i them këto. Unë jam thjesht një zë, pasi këto thuhen dhe stërthuhen nga Këshilli i Europës, nga Komiteti për Parandalimin e Torturës në Këshillin e Europës, nga raportet ku Shqipëria, për faqen më të zezë të të gjithëve atyre që ia kanë vënë këtë njollë, renditet në fund fare të vendeve, jo të BE-së, por të gjithë kontinentit europian, rrot më rrot me Rusinë, për paraburgim pa gjyq të njerëzve si të ishin mish për top”, u shpreh Rama.

Sipas Ramës, 58% e personave që ndodhen aktualisht në institucionet e vuajtjes së dënimit janë të paraburgosur.

“58% e njerëzve që sot janë mbrapa hekurave janë të paraburgosur. Imagjinoni sa të pafajshëm ka aty, ndër ta. Sikur edhe një prej tyre të jetë i pafajshëm, ky është një problem. Por besoj që probabiliteti është shumë më i lartë se kaq. Futen në paraburgim dhe harrohen brenda”, tha Rama.

Kryeministri theksoi se mazhoranca nuk do të pajtohet me situata që, sipas tij, cenojnë standardet e drejtësisë dhe të drejtave të njeriut.

“Kjo nuk është diçka me të cilën ne mund të pajtohemi dhe ne nuk do të pajtohemi”, u shpreh Rama.

Marrë nga ATSH