Kryeministri Edi Rama ka komentuar emërimin e Kryeinspektorit të sapoemëruar, ish-deputet i PD-së në disa legjislatura, Dashnor Sula, duke e cilësuar detyrën e marrë prej tij si një sfidë personale për të adresuar problematikat në treg.

Gjatë një takimi për reformën në sistemin e inspektimeve, Rama i kujtoi Sulës sulmet ndaj qeverisë kur ishte në opozitë.

“Kryeinspektori vjen nga një karrierë që ka përfshirë aspekte politike, por ai ka një përvojë të pasur edhe në sistemin e drejtësisë. Ka të gjithë formimin e nevojshëm për të ndjekur këtë punë”, tha Rama.

Për Kryeministrin, ky është një moment kyç për të punuar më ngushtë për të përmirësuar sistemin e inspektimeve dhe për të siguruar transparencën dhe efikasitetin në trajtimin e ankesave dhe inspektimeve, me fokus në një konkurrencë të ndershme dhe të barabartë për të gjithë sipërmarrësit.

“Kur vjen puna tek politika ndarja është edhe e natyrshme, sepse jetojmë në një sistem demokratik. Por kur vjen puna tek shteti, kur vjen puna tek objektivat e përbashkët, pra kohës sa na jepet mundësia, mirë është që të përpiqemi së bashku. Kjo është në një farë mënyre edhe një lloj sfide personale se dhe mua nuk më ka kursyer zotëria kur kam qenë në Parlament. Tani ta shohim se si i bën gjërat për të cilat nuk na ka lënë gjë pa thënë ne që nuk i bënim ashtu si duhet”, deklaroi Rama.

Burimi ATSH