Kryeministri Edi Rama informoi sot publikun përmes një reagimi në rrjetin social X se “gjykatat kanë dhënë deri më tani 92 raste në favor të llumit të pastruar nga vetingu, duke u dhënë një trajtim financiar prej rreth 12 milionë eurosh nga buxheti i shtetit”.

Kryeministri u shpreh se me këto vendime, gjykatat i trajtojnë jo si fajtorë, po si viktima që duhen dëmshpërblyer.

“Akoma më keq, këto vendime gjykatash janë dhënë me urdhër ekzekutimi pa marrë vendimi formë të prerë (në Gjykatën Administrative të Apelit), duke e detyruar ISSH-në që nga fondi i pensioneve të kryejë pagesat për shkak të vendimit me ekzekutim”, informoi Kryeministri Rama.

Dhe ndërkohë, sipas tij, radha për të marrë lekë nga taksat vazhdon edhe përtej këtij numrit 92, që do të thotë se ato 12 milionët mund të shkojnë shumë më tepër.

“Kjo quhet pavarësi e papërgjegjshme”, përfundoi reagimin kreu i qeverisë.

Burimi ATSH