Kryeministri Edi Rama, gjatë një bisede për zhvillimin e industrisë së filmit në vend, tha se Shqipëria është e hapur për kineastët e talentuar, pavarësisht kombësisë së tyre.

Rama kishte të ftuara sot në podkastin “FLASIM – Episodi 3, Sezoni 6” dy motra kineaste shqiptare nga Vlora, Vilma dhe Greta, të cilat jetojnë dhe veprojnë në Los Angeles të Shteteve të Bashkuara të Amerikës, ku merren me prodhimin e filmave.

I pyetur se se cili është vizioni i tij lidhur me kineastët që kanë dëshirë të vijnë në Shqipëri nëse do të favorizohen më shumë të huajt apo shqiptarët, Kryeministri u shpreh se, “është një çështje e talentit, jo e kombësisë. Kush është i talentuar, është i talentuar”.

“Grupet që krijohen shpesh përmbajnë kombinime të ndryshme nacionalitetesh”, theksoi Rama.

Ai bëri të ditur se në vend funksionon Akademia e Filmit “Marubi”, ndërsa së fundmi është hapur një tjetër akademi nga dy amerikanë të apasionuar, njëra prej të cilëve është “Script Writer”.

Këto iniciativa ofrojnë një mjedis të mirë për zhvillimin e kinematografisë dhe kanë sjellë përvojë të re për producentët dhe distributorët e huaj, theksoi ai.

Rama shtoi se Shqipëria ka një avantazh unik gjeografik, duke ofruar në një perimetër të vogël mal, det, qytete të vjetra dhe të reja, që mund të shfrytëzohen për prodhime filmike.

Ai nënvizoi se, megjithëse Shqipëria është vend i vogël dhe nuk mund të pretendojë prodhime masive, filma të metrazhit të shkurtër realizohen dhe tregojnë talentin e të rinjve.

Kryeministri përmendi gjithashtu edhe suksesin e Erenik Beqirit, i cili fitoi “Luanin e Artë” për filmin e metrazhit të shkurtër “Një udhëtim i shkurtër” në kategorinë “Orizzonti” në Festivalin e Filmit në Venecia.

“Ne kemi një djalë të jashtëzakonshëm që fitoi në Venecia për filmin e shkurtër”, u shpreh Rama.

Burimi ATSH