Drejtoresha Ekzekutive e Autoritetit Shqiptar të Mbikëqyrjes Financiare (AMF), Adela Xhemali, mori pjesë në Forumin Rajonal Euromoney për Evropën Qendrore dhe Lindore, i cili po zhvillohet në Vjenë, një nga platformat më prestigjioze ndërkombëtare për financat dhe investimet në rajon.

Në kuadër të këtij forumi, Xhemali ishte pjesë e panelit të diskutimit me temë “Anëtarësimi i Shqipërisë në BE: A është sistemi financiar gati?”, ku prezantoi progresin e Shqipërisë në përafrimin e sektorit financiar jo-bankar me standardet e Bashkimit Evropian.

Gjatë diskutimeve të nivelit të lartë në Forumin e 31-të të Evropës Qendrore dhe Lindore, të organizuar nga Financial Times, Xhemali theksoi rolin gjithnjë e më të rëndësishëm të sigurimeve, fondeve të investimeve, pensioneve private dhe tregjeve të kapitaleve në mbështetje të rritjes së qëndrueshme ekonomike dhe stabilitetit financiar në Shqipëri.

Ajo prezantoi qasjen graduale dhe të strukturuar të AMF-së për zbatimin e një kuadri mbikëqyrës të bazuar në parimet e Solvency II, duke nënvizuar se reformat e vazhdueshme, të mbështetura nga një udhërrëfyes i Bankës Botërore, po forcojnë mbikëqyrjen e bazuar në risk, qeverisjen korporative dhe qëndrueshmërinë e kapitalit në sektorin financiar jo-bankar.

“Këto reforma rrisin transparencën, parashikueshmërinë rregullatore dhe besimin e investitorëve, duke mbështetur progresin e vazhdueshëm të Shqipërisë drejt anëtarësimit në Bashkimin Evropian”, theksoi Xhemali.

Pjesë e panelit ishin edhe ministrja e Ekonomisë dhe Inovacionit, Delina Ibrahimaj, si dhe Guvernatori i Bankës së Shqipërisë, Gent Sejko.

Forumi Rajonal Euromoney mbledh ministra të financave, guvernatorë bankash qendrore, përfaqësues të bankave kryesore, korporata dhe investitorë globalë, duke shërbyer si një platformë kyçe për shkëmbimin e ideve dhe formësimin e drejtimit të financimit dhe investimeve në rajonin e Evropës Qendrore dhe Lindore.

Marrë nga ATSH