Instituti i Gjeoshkencës informoi se sipas llogaritjeve hidrologjike, si rezultat i reshjeve me intensitet të lartë të rëna gjatë ditëve të kaluara dhe ditën e sotme, do të ketë rritje të prurjeve dhe niveleve në lumenjtë Mat, Ishëm, Erzen, Shkumbin, Seman.
Sipas IGJEO-s rrezik të shtuar për përmbytje në vazhdim të ditës së sotme do të ketë lumi Vjosë, lumi Drin-Buna dhe liqeni i Shkodrës, ndërsa prej ditës së nesërme, e premte 9 janar, pritet rënie e prurjeve dhe niveleve në të gjithë lumenjtë.
Sot dhe nesër reshjet e dëborës pritet të përfshijnë zonat në veri, lindje dhe juglindije të territorit.
Reshjet e dëborës të pasuara nga ulja e ndjeshme e temperaturave dhe ngricat mund të krijojnë probleme të ndryshme dhe vështirësi në transportin rrugore.
Ndërkohë që në qarqet Shkodër, Kukës, Lezhë priten reshje mesatare deri lokalisht intensive, teksa në Dibër priten reshje mesatare. Në qarqet Durrës, Tiranë, Elbasan priten reshje të dobëta deri lokalisht mesatare ndërsa në qarqet e tjera priten reshje të dobëta. Reshjet priten të shoqërohen me shtrëngata.

Në veri, lindje dhe juglindje në lartësitë mbi 300 metra nga niveli i detit reshjet do të jenë në formë dëbore.

Të premten temperaturat minimale dhe maksimale të ajrit pritet të arrijnë: në bregdet: 2 / 12 °C, në vendet e ulëta: -2 / 9 °C dhe në vendet malore: -6 / 6 °C.
Era sot dhe nesër pritet të fryjë mesatare deri e fortë në bregdet dhe në zonat malore.