Kryeministri Edi Rama deklaroi sot se “Europa 2030 nuk është shpresë, por është destinacion dhe busulla jonë është e qartë drejt Bashkimit Europian”.

Në fjalën e mbajtur në “Tirana Economic Forum”, Rama tha se “tashmë negociatat janë të hapura dhe kapitujt po ecin përpara”.

“Objektivi ynë është realist dhe i arritshëm, patjetër me një kusht: që Europa të mbajë premtimin dhe që së bashku ne t’i përmbahemi kalendarit për të cilin jemi marrë vesh bashkërisht”, theksoi Kryeministri.

Anëtarësimi i Shqipërisë në BE në vitin 2030, sipas Ramës, “është absolutisht i mundshëm”.

“Nuk jemi këtu për të pritur për Europën, por që ta ndërtojmë Europën këtu dhe prandaj ne jemi kaq të zellshëm për të ndjekur këtë rrugëtim drejt Europës”, theksoi Rama.

Kreu i qeverisë theksoi se “Europa nënkupton institucione, standarde dhe nuk është vetëm politika, por është edhe zhvillim”.

“Shqipëria po hyn në një kapitull të ri, që është sa i pëlqyeshëm, aq edhe sfidues, dhe është një kapitull zhvillimi modern, besimi dhe ambicie europiane. Ne kemi stabilitet, ne kemi ritmin, ne kemi një shoqëri të re, plot me talente dhe me energji. Kemi hartën, kemi vizionin dhe kemi vullnetin për të ecur përpara”, siguroi ai.