Agjencia Kombëtare e Zonave të Mbrojtura (AKZM) ka katërfishuar të ardhurat në periudhën e 3-4 viteve të fundit.

Kështu bëri të ditur Kryeministri Edi Rama, gjatë një takimi ku u diskutua mbi prioritetin e mjedisit dhe pyjeve, që do të hyjnë në një fazë të re përmes modelit unik të administrimit dhe zhvillimit të qëndrueshëm.

Rama theksoi se të ardhurat janë katërfishuar për shkak të sistemit të menaxhimit elektronik të të ardhurave, i cili sipas tij do të shtrihet në gjithë territorin.

“Agjencia e Zonave të Mbrojtura i ka katërfishuar të ardhurat e veta vetëm në periudhën e 3-4 viteve të fundit. Po të shohësh nga vijnë këto të ardhura kuptohet se potenciali është shumë më i madh”, shtoi Rama.

“Kryesisht rreth 70% i këtyre të ardhurave të katërfishuara, vijnë nga tre pika që janë Syri i Kaltër, Kune Vain dhe Mali i Dajtit, vijnë jo vetëm për shkak të fluksit, sepse fluks ka edhe në pika të tjera, por sepse sistemi i menaxhimit elektronik të të ardhurave ka sjellë një hop cilësor gjë që e bën të domosdoshme shtrirjen e këtij sistemi në të gjithë territorin”, tha Rama.

Marrë nga ATSH