Data 5 dhjetor shënon Ditën Ndërkombëtare të Vullnetarizmit. Në kuadër të kësaj dite, presidenti i vendit Bajram Begaj shprehu nderimin për të gjithë vullnetarët që shërbejnë pa kushte për komunitetin.

“Ju jeni shtylla morale që mban gjallë angazhimin vullnetar social dhe solidaritetin”, theksoi Begaj.

Sipas presidentit “kjo ditë na kujton forcën e një shoqërie të ngritur mbi ndihmën dhe përkushtimin, vlera themelore të karakterit tonë kombëtar”.

“Respekt dhe mirënjohje çdo nisme që fuqizon komunitetin dhe u qëndron pranë qytetarëve. Vazhdoni me kurajë!”, shkruan Begaj.

Begaj e përmbyll reagimin duke theksuar se “Shqipëria ka nevojë për zemrën dhe kontributin tuaj sot dhe çdo ditë”.

Vlerësohet se ka rreth 1 miliard vullnetarë në mbarë botën. Rreth 70% bëjnë vullnetarë joformalisht, duke ndihmuar drejtpërdrejt njerëzit në komunitetet e tyre, ndërsa 30% angazhohen përmes organizatave formale.

Vullnetarizmi merr shumë forma. Vullnetarët kontribuojnë përmes iniciativave lokale, platformave online dhe detyrave ndërkombëtare. Ata shpesh punojnë në kushte sfiduese, duke sjellë kreativitet, ndjeshmëri dhe qëndrueshmëri në misionet e tyre.

Këtë vit, nën temën frymëzuese “Çdo kontribut ka rëndësi”, Dita Ndërkombëtare e Vullnetarëve 2025 merr një rëndësi historike pasi shënon fillimin zyrtar global të Vitit Ndërkombëtar të Vullnetarëve për Zhvillim të Qëndrueshëm (IVY 2026).

Burimi ATSH