Në Tiranë u zhvillua ceremonia e nënshkrimit të marrëveshjes së grantit nga Banka Botërore dhe Bashkimi Evropian për programin e sigurt dhe të qëndrueshëm të transportit, i administruar nga BB.

Granti u nënshkrua në kuadër të samitit “Plani i Rritjes -Rruga jonë drejt BE-së” mbajtur sot në Tiranë.

Drejtorja për Ballkanin Perëndimor në Drejtorinë e Përgjithshme për Zgjerimin dhe Fqinjësinë Lindore pranë Komisionit Evropian, Valentina Superti, theksoi se fondi prej 54 milionë euro do të kontribuojë në përmirësimin e sigurisë rrugore dhe hekurudhore, rritjen e kapaciteteve teknike, digjitalizimin e sistemeve dhe zgjerimin e korsive.

Ky grant shkon përveç financimit të mëparshëm, duke e çuar totalin e mbështetjes së BE-së në 134 milionë euro që nga viti 2023.

“Ky fond tregon rëndësinë që i kushton Bashkimi Evropian këtij programi dhe do të lehtësojë qarkullimin në pikat kufitare, duke nxitur tregtinë rajonale” tha përfaqësuesja e Komisionit Evropian.

Xiaoqing Yu, drejtoresha e Bankës Botërore për Ballkanin Perëndimor shprehu optimizëm për bashkëpunimin me BE-në dhe u theksua se ky grant i ri është një shenjë e angazhimit për zhvillimin e transportit në Ballkanin Perëndimor.

Sipas saj, kjo është vetëm nisma e parë, ndërsa janë parashikuar edhe projekte të tjera për përmirësimin e infrastrukturës dhe kapaciteteve të transportit rajonal.

Drejtoresha e Bankës Botërore, Yu, deklaroi se grantit të i ri i kushtohet rëndësi strategjike si pjesë e bashkëpunimit të vazhdueshëm për Ballkanin Perëndimor. Sipas saj, një sistem transporti më i sigurt dhe i aksesueshëm do të ndihmojë në thellimin e tregtisë dhe rritjen ekonomike në rajon.

Yu theksoi se transporti i sigurt dhe i qëndrueshëm përbën një paketë investimesh që ndihmon vendet e Ballkanit Perëndimor të afrohen më shumë me Bashkimin Evropian. “Ky program lehtëson qarkullimin në pikat e kalimit kufitar dhe digjitalizon sistemet e transportit. Faza e parë e tij, me vlerë 18 milionë euro, tashmë ka 89% të fondit në zbatim, ndërsa gjithashtu shfrytëzon 219 milionë euro nga Banka Botërore për lidhjen e transportit rajonal, duke mundësuar investime më të mëdha në infrastrukturë,” tha ajo.

Drejtoresha vlerësoi bashkëpunimin me vendet e Ballkanit Perëndimor, Drejtorinë për Zgjerimin dhe komunitetin e transportit, duke theksuar se qëllimi është forcimi i bashkëpunimit dhe sjellja e më shumë investimeve në rajon.

Programi Lehtësimi i Transportit 2 është një shembull konkret i mbështetjes së rajonit dhe integrimit të tij në BE, duke synuar një rrjet transporti më të sigurt, digjital dhe efikas për të gjithë Ballkanin Perëndimor.

Burimi ATSH