Ministri i Turizmit, Kulturës dhe Sportit, Blendi Gonxhja, uroi skiatoren Lara Colturin, për fitoren e vendit të dytë në Botërorin e Skive që u zhvillua në Levi të Finlandës.

“Lara Colturi fiton vendin e dytë në Botërorin e Slalomit të Skive në Finlandë! Shqipëria shkëlqen në pistë me një performancë spektakolare, me një diferencë minimale ndaj kampiones Shiffrin, e cila fitoi për herë të nëntë Slalomin në Levi të Finlandës! E gjithë kjo në një ditë të veçantë për Larën, e cila sot feston edhe ditëlindjen e saj të 19-të!”, thekson Gonxhja.

Skitarja 19-vjeçare, u rendit vetëm 1.66 sekonda pas legjendës amerikane Mikaela Shiffrin, fitueses për të nëntën herë të garës në këtë pistë.

Kjo performancë vjen vetëm tre javë pas vendit të shtatë në Sölden të Austrisë dhe përkon me ditëlindjen e saj të 19-të.

Lara Colturi me këtë vend të dytë në garën e Slalomit mori 80 pikë duke e çuar në 116 pikë totalin pas dy garave të para të Kupës së Botës dhe e sheh veten në vendin e tretë në renditjen e përgjithshme, pas Mikaela Shiffrin dhe Paula Moltzan. Javën që vjen Lara Colturi do jetë në pistën e Gurgl në Austri, në disiplinën e Slalomit.

Burimi ATSH