Kryeministri Edi Rama u shpreh sot se krijimi i Operatorit Kombëtar të Ujit do t’i japë përgjigje mirëadministrimit në funksion të rritjes së furnizimit me ujë të qytetarëve.

Në një bashkëbisedim me banorët e njësisë nr. 3 në Tiranë, Rama tha se edhe çështja e furnizimit me ujë të pijshëm është prapë sfidë që lidhet me rritjen e popullsisë.

Por ndërkohë, kryeministri theksoi se “jo vetëm që përmirësimi është i përditshëm, por jemi duke diskutuar se si mund të marrim një partner të madh nga Europa”.

“Jemi duke diskutuar me disa kompani të mëdha që punojnë në të gjithë botën për sistemin e ujit të pijshëm, sepse në radhë të parë është çështje administrimi, menaxhimi.
Ndërmarrjet tona të ujit, megjithëse ne kemi përmirësuar shumë, kanë shumë burime njerëzore skarco brenda. Kanë shumë njerëz që janë punësuar kot, që s’kanë lidhje fare me ndërmarrjen”, tha Rama.

Për këtë, Kryeministri theksoi se është plani për të ngritur Operatorin Kombëtar të Ujit, njësoj siç kemi Operatorin Kombëtar të Energjisë, që tashmë është një histori e plotë suksesi.

“Operatori i Ujit do të drejtohet në mënyrë të përqendruar. Nuk do të jetë më ndërmarrje këtu, ndërmarrje atje, lloj-lloj ndërmarrjesh me lloj-lloj lodrash që nuk janë më, e që pretendojnë të hyjnë në BE për pak vite. E njëjta gjë edhe për mbetjet”, shtoi Rama, duke theksuar se këto janë sfida të mëdha dhe nuk janë çështje fondesh.

Burimi ATSH