Kryeministri Edi Rama komentoi sot situatën politike në vend, duke nisur me rolin e opozitës, të cilën e përshkroi si jo funksionale.

“Patjetër që do të ishte mirë të kishim një opozitë. Ngushëllojmë veten duke u përpjekur të bëjmë sa më mirë punën, duke u bërë opozitë e vetvetes në shumë raste. Kjo është ajo që kemi në këto momente”, tha Rama në një intervistë për media, nga Roma, pas mbledhjes ndërqeveritare Shqipëri-Itali.

Ai theksoi se pavarësisht sfidave politike, qeverisja e vendit funksionon më mirë se kurrë më parë.

“Por nëse Shqipëria është në momentin e vet më të mirë të këtyre viteve kjo natyrisht lidhet me faktin që Shqipëria sot qeveriset më mirë se është qeverisur ndonjëherë dhe kjo lidhet me faktin që qeveria ka kapacitet politik në kuptimin e mbështetjes që buron nga besimi i njerëzve dhe nga numrat që ka në Parlament.

Kryeministri vuri në dukje se mandati i ardhur nga 11 maji është një mandat shumë i fortë për të realizuar ndryshimet e duhura dhe për të përmirësuar proceset zgjedhore.

“Nuk kemi nevojë të bëjmë asnjë sakrificë nga pushteti politik, përkundrazi, pushteti na duhet për t’i realizuar të gjitha detyrat, sepse shqiptarët na besuan duke na dhënë një mandat shumë të fortë”, shtoi Rama.

Burimi ATSH