Projektit i ri i Këshillit të Evropës “Mbështetje për Ciklin e Procesit Zgjedhor në Shqipëri – Zyra e Këshillit të Evropës në Tiranë (SECA)”, u prezantua sot në Tiranë

Ky projekt synon të forcojë transparencën, gjithëpërfshirjen dhe integritetin e procesit zgjedhor në Shqipëri.

I pranishëm në prezantimin e projektit, ambasadori i Bashkimit Evropian në vendin tonë Silvio Gonzato tha se projekti do të rrisë kapacitetet institucionale të KQZ-së, si dhe do të nxisë dhe promovojë “pjesëmarrjen aktive të shoqërisë civile, medias dhe do të fuqizojë transparencën e proceseve zgjedhore në përputhje me standardet evropiane”.

Gonzato theksoi se “profesionalizmi dhe depolitizimi i administratës zgjedhore janë thelbësore për të garantuar që çdo proces zgjedhor të drejtohet në mënyrë të paanshme dhe transparente”.

“Një KQZ e paanshme në të gjitha nivelet administrative është gur themeli i besimit të publikut tek zgjedhësit dhe një standard matës në rrugëtimin e Shqipërisë drejt BE-së”, tha Gonzato.

Gonzato nënvizoi se një aspekt kyç i partneritetit me KQZ-në do të jetë përforcimi i “mbikëqyrjes digjitale”, i cili sipas tij do të bëjë “të sigurt që teknologjitë e reja që do të përdoren në zgjedhje, do të jenë transparente dhe të sigurta”, në mënyrë që “të mbrojnë të dhënat e qytetarëve”.

Ndryshimet teknologjike tha Gonzato, sjellin “shanse madhore për pjesëmarrje dhe transparencë, por edhe cenueshmëri për dezinformacion dhe manipulime me Inteligjencën Artificiale e me çështje të sigurisë kompjuterike”.

“Reforma Zgjedhore është pjesë domethënëse e rrugëtimit dhe zotimit që ka Shqipëria në grup-kapitullin e parë për anëtarësimin në BE, që janë pjesët themeltare, të parat që hapen dhe të fundit që mbyllen dhe që kontribuojnë drejtpërdrejt, tek udhërrëfyesi për funksionimin e institucioneve demokratike, që theksojnë rëndësinë e zgjedhjeve, transparencë, llogaridhënien dhe pjesëmarrja e qytetarëve, që janë themelet e anëtarësimit në BE”, tha Gonzato.

Gonzato theksoi se “demokracia nuk është diçka stacionare, ajo evoluon nëpërmjet teknologjisë, por mbështetet mbi vlera të përbashkëta dhe duhet të mbetet e tillë, e mbështetur mbi vlera, transparencë, integritet dhe besimin tek zgjedhjet”.

“BE qëndron e palëkundur në mbështetje të Shqipërisë dhe veçanërisht KQZ-së në këtë rrugëtim”, u shpreh Gonzato.

Bashkëfinancuar nga Bashkimi Evropian dhe Këshilli i Evropës, dhe zbatuar nga Këshilli i Evropës në bashkëpunim me Komisionin Qendror të Zgjedhjeve, projekti SECA do të kontribuojë në përparimin e qeverisjes demokratike dhe përshtatjen e mëtejshme me standardet e BE-së dhe ato ndërkombëtare.

Burimi ATSH