Kandidati i pavarur, i mbështetur nga Partia Demokratike, për kreun e bashkisë së Beratit në zgjedhjet e pjesshme vendore të datës 9 nëntor, Pavlo Shkarpa ftoi sot bashkëqytetarët e tij ta votojnë, pasi siç shprehet ai, “e dua këtë qytet e kam ëndërra për këtë qytet, por jam gjithashtu kritikues për “plagët” e tij, si dhe vlerësues për punët e mira që Bashkia ka zhvilluar”.

Ai vizitoi sot ish-fushën e vjetër e futbollit, e cila tashmë është shndërruar në një kënd lojërash për fëmijë. Dikur aty luhej futboll i bukur, ndërsa sot kjo hapësirë i është dedikuar lojës dhe argëtimit për më të vegjëlit.

Duke vlerësuar punën e bërë nga paraardhësit, Shkarpa theksoi se “kjo është një vepër e bukur dhe më gëzon të shoh se Bashkia ka investuar për fëmijët tanë.

Megjithatë, më shqetëson fakti që për të luajtur aty fëmijët duhet të paguajnë. Nëse do të jem Kryetar i Bashkisë, do të heq tarifën e hyrjes, ndërkohë që Bashkia do të forcojë rregullat për mirëmbajtjen e këndit, në mënyrë që fëmijët të luajnë aty me siguri dhe dashuri”.

Ai i siguroi bashkëqytetarët beratas se së bashku mund ta bëjnë Beratin një qytet ku çdo fëmijë mund të luajë lirshëm dhe i sigurt.

Marrë nga ATSH