Kryeministri Edi Rama mori pjesë sot në dialogun me moderatorin, Ali Asllan dhe Ministren e Shtetit për Inteligjencën Artificiale, Diella në kuadër të Berlin Global Dialogue (BGD).

I pyetur nëse e ndjek në rrjete sociale Presidentin e Shteteve të Bashkuara të Amerikës, Donald Trump, Rama u shpreh se, “Nuk është më në Twitter, quhet Social Truth, është një nivel më lart. Dhe për të qenë shumë i drejtë në raport me të është shumë angazhues dhe argëtues, natyrisht që e shikoj”.

Por, theksoi Rama, “çështja këtu, nëse flasim për Europën është që unë vazhdoj të besoj se kur Donald Trump tha, e ndoshta vazhdon të thotë, që Zoti kishte një plan për të dhe për Amerikën, prandaj dhe Zoti e shpëtoi nga përpjekja e tmerrshme për ta vrarë, unë mendoj që kjo është vetëm gjysma e së vërtetës”.

“Sepse gjysma tjetër e së vërtetës është që Zoti e shpëtoi për të shpëtuar edhe Europën, në kuptimin që Europa duhet të mbledhë veten dhe duhet të kuptojë shpejt, sa më shpejt, jo vetëm me fjalë, por edhe me vepra, që nëqoftëse do të ruajë rëndësinë e saj, duhet të ndryshojë dhe duhet të ndryshojë me shpejtësi, duke e nisur me reflektimin mbi atë çka ka ndodhur deri në zgjedhjen e Donald Trump dhe më pas përkundrejt luftës në Ukrainë dhe të pyesë veten nëqoftëse ka një strategji të qartë për këtë dhe nëqoftëse është e bëshme të vazhdojë t’i jashtëkontraktojë amerikanëve politikën e vetë të jashtme, e nëse është normale që të mos ketë vetë planin e saj të paqes”, tha Rama.

“Jo nuk e njoh mirë, por në njëfarë mënyre të gjithë e njohin mirë sepse është mjaft i ekspozuar dhe ai po formëson epokën e re duke qenë shumë i drejtpërdrejtë, duke qenë shumë i sinqertë dhe duke sfiduar që të gjithë të jenë të drejtpërdrejtë dhe të sinqertë”, tha Rama.

“Përgjithësisht Bashkimi Europian dhe vendet anëtare në veçanti kur ju duhet të veprojnë me urgjencë për të ndryshuar kanë shumë mungesa në të qenit të drejtpërdrejtë dhe në të qenit të sinqertë”, theksoi Rama.

Rama: Batuta për deklaratën e Trump, shaka miqësore, u keqpërdor nga demokratët në SHBA

I pyetur në lidhje me batutën miqësore me presidentin e Azerbajxhanit, Ilham Aliyev për deklaratën e presidentit të SHBA, Donald Trump, për paqen mes Azerbajxhanit dhe Shqipërisë, duke e ngatërruar me Armeninë, Rama u shpreh se, “ky është një shembull tjetër sesa në pozitë të keqe janë demokratët në SHBA, sepse kjo ka qenë një shaka shumë miqësore me Ilhamin, sepse jemi miq të ngushtë prej një kohe të gjatë tashmë dhe ishte vërtetë shumë mirë që shiheshim pas kaq humbjeje dhe pas kaq shumë përpjekjesh për të vrarë njëri-tjetrin”.

Rama theksoi se, fakti që kjo shaka miqësore u bë virale në Europë është argëtuese, por fakti që në SHBA u përdor për të sulmuar presidentin ishte diçka që realisht më mërziti.

“Por fakti që kjo shaka miqësore u bë virale në Europë është argëtuese. Por fakti që në SHBA u përdor për të sulmuar presidentin ishte diçka që realisht më mërziti shumë në thelb për demokratët sepse e kanë humbur realitetin dhe vazhdojnë të besojnë që epërsia morale mjafton për ta të pretendosh që presidenti Trump është aty ku është dhe në fakt aty është, pra ç’mund të bësh në fund të fundit për të”, u shpreh Rama.