Në kryeqytet vijon dita e dytë e panairit “Auto Moto d’Epoca”, një ngjarje që po tërheq gjithnjë e më shumë vëmendjen e dashamirësve të automjeteve klasike dhe historike.

Gjatë gjithë ditës, vizitorët treguan kureshtje për koleksionet e rralla të ekspozuara, duke u mahnitur nga pasioni dhe përkushtimi me të cilin komuniteti shqiptar i automotivës po ruan historinë dhe trashëgiminë e këtyre mjeteve ikonike.

Organizatorët theksojnë se interesi i madh i publikut tregon se dashuria për automjetet klasike është kthyer në një pasion të përbashkët, që bashkon breza dhe kontribuon në ruajtjen e një pjese të rëndësishme të identitetit kulturor shqiptar.

“Është një ndjenjë krenarie të shohësh se Shqipëria ka një komunitet kaq të fortë dhe të përkushtuar, që e konsideron këtë pasuri kulturore si pjesë të historisë sonë kombëtare”, u shprehën përfaqësues të Drejtorisë së Përgjithshme të Shërbimit të Transportit Rrugor.

Panairi “Auto Moto d’Epoca” do të vijojë edhe në ditët në vijim, duke ofruar për publikun një udhëtim unik në kohë përmes mjeteve që “flasin më shumë se 1000 fjalë”.

Burimi ATSH