Ministrja e Arsimit, Mirela Kumbaro në vijimësi të inspektimeve në qarkun e Fierit vizitoi shkollën artistike “Jakov Xoxa” në Fier.

Pas rikonstruksionit të kësaj shkolle, shtimi i mjediseve të reja ku studiohet për muzikë, arte figurative dhe koreografi, ka bërë që të rritet ndjeshëm cilësia e mësimdhënies.

“Shkolla “Jakov Xoxa” është një galeri e veçantë artesh”, u shpreh Kumbaro e cila takoi nga afër nxënës në arte figurative, muzikë e koreografi si dhe u njoh me përkushtimin e pasionin e mësuesve.

Kumbaro u shpreh se “investimet në infrastrukturë, bazë didaktike dhe kurikula kanë zgjeruar ofertën e kësaj shkolle për nxënësit e Fierit dhe zonave përreth, të cilët talentet mund t’i kthejnë në një profesion dhe të shkëlqejnë në të ardhmen”.

Pas investimit prej 70 milionë lekësh nga qeveria shqiptare në bashkëpunim me bashkinë e Fierit kjo shkollë ofron kushte me standarde për nxënësit e pasionuar pas artit. Rikonstruksioni i shkollës përfshiu 6200 metra katrorë hapësirë të brendshme dhe 4500 m2 terrene të jashtme.

Shkolla artistike “Jakov Xoxa”, zanafillën e ka në vitin 1966 pranë shkollës 8-vjeçare “Andon Xoxa”, ku u çel klasa e parë për degët piano, violinë, klarinetë, oboe, fizarmonikë etj. Në vitin 1979 u themelua shkolla e mesme artistike. Shkolla pagëzohet me emrin e patriarkut të letërsisë shqipe, shkrimtarit myzeqar Jakov Xoxa dhe do të njihet me emrin “Shkolla e Mesme Artistike Jakov Xoxa”.

Tre vite më vonë, në vitin 1981 u çel dega e Arteve Figurative në pikturë dhe skulpturë, me specialitetet përkatëse: grafikë, tekstil, qeramikë, skenografi, stilim, fotografi artistike, gdhendje në dru dhe gur. Në vitin 1999 shkollës iu shtua statusi kombëtar. Prej 7 vitesh në këtë shkollë është çelur dhe një degë e re, ajo e koreografisë, ku studiohet si baleti klasik, ashtu edhe ai modern.

Burimi ATSH