Në Ditën Botërore dhe Evropiane të Statistikave, përfaqësues të lartë të institucioneve shqiptare dhe Bashkimit Evropian theksuan rëndësinë thelbësore të statistikave cilësore dhe të paanshme në procesin e integrimit evropian të Shqipërisë.

Në takimin e zhvilluar sot në Tiranë, shefja e Bashkëpunimit të Delegacionit Evropian në Shqipëri, Ritva Heikkinen, deklaroi se statistikat janë baza e politikave të qëndrueshme dhe se ato nuk përfaqësojnë vetëm shifra, por prova të nevojshme për të vlerësuar përparimin në negociatat me BE-në.

Ajo veçoi Kapitullin 18, që lidhet me statistikat, si një nga elementët kyç për përshpejtimin e hapjes së kapitujve të tjerë, duke nënvizuar nevojën për profesionalizëm, pavarësi dhe cilësi në prodhimin e të dhënave.

Në të njëjtën linjë ishte edhe drejtuesja e INSTAT-it, Elsa Dhuli, e cila theksoi se statistikat cilësore janë themeli për hartimin e politikave të bazuara në fakte dhe të dhëna të sakta.

Ajo shtoi se besimi në statistikat zyrtare është i domosdoshëm për avancimin e Shqipërisë në rrugën drejt BE-së, duke kërkuar zbatim të plotë të Kodit të Praktikave të Statistikave Evropiane.

“Në këtë proces fjala kyçe është statistikat cilësore janë bazë për hartimin e politikave të mbështetura në fakte dhe shifra. Kjo u i jep statistikave një rol të pazëvendësueshëm në rrugën e integrimit evropian. Besimi në statistika zyrtare është i domosdoshëm për integrimin në BE dhe kjo nënkupton zbatimin e kodit të praktikave të statistikave evropiane”, tha Dhuli.

Ndërsa ambasadorja e Zvicrës në Shqipëri, Ruth Huber, e konsideroi jetike përfshirjen e aktorëve lokalë në krijimin e të dhënave të besueshme, për të ndërtuar një qeverisje të hapur dhe llogaridhënëse.

“Të dhënat e besueshme të bashkëkrijuara me aktorët lokalë hedhin themelet për një qeverisje llogaridhënëse. Ne duhet të fokusohemi tek statistikat që ato të jenë të lehta për t’u kuptuar, të besueshme, për të fuqizuar shoqërinë civile, biznesin, mediet, akademinë dhe aktorët lokalë”, theksoi Huber.

Kapitulli 18 i bisedimeve me Brukselin, i lidhur me statistikat, kërkon investime në infrastrukturën statistikore dhe përshtatje me standardet e BE jo vetëm në nivel qendror, por edhe në atë lokal.

Qeveria shqiptare është e angazhuar të përmbushë të gjitha standardet e BE-së në prodhimin dhe përpunimin e statistikave zyrtare deri në vitin 2027, kur synohet përmbyllja e negociatave për anëtarësim.

Burimi ATSH