Trupa e gjyqtarëve të Gjykatës Kushtetuese të Shqipërisë priti sot në një takim delegacionin e kryesuar nga kryetarja e Gjykatës së Lartë të Holandës, Dineke de Groot.

Delegacioni holandez po zhvillon një vizitë disaditore në Shqipëri për intensifikimin e dialogut gjyqësor në kuadër të procesit të anëtarësimit të Shqipërisë në Bashkimin Europian.

Fillimisht, Zaçaj falënderoi De Groot për mbështetjen e dhënë nga Gjykata e Lartë e Holandës për anëtarësimin e Gjykatës Kushtetuese të Kosovës në Konferencën e Gjykatave Kushtetuese Europiane, gjatë Mbledhjes Përgatitore të Rrethit të Kryetarëve që u zhvillua në Tiranë në kuadër të kryesimit të kësaj Konference nga Gjykata Kushtetuese e Shqipërisë.

Më pas, palët shkëmbyen mendime për rolin e gjykatave kushtetuese dhe të larta në sistemet respektive, si dhe për limitet e ndërthurjet e juridiksioneve ndërmjet tyre gjatë interpretimit të Kushtetutës dhe ligjeve.

Po ashtu, gjatë takimit u diskutua lidhur me eksplorimin e mundësive të bashkëpunimit ndërmjet dy gjykatave me qëllim shkëmbimin e praktikave më të mira dhe referimin në standardet më të larta dhe të konsoliduara për mbrojtjen e lirive dhe të drejtave themelore të njeriut.

Në fokus të këtij takimi ishte edhe marrëdhënia e gjykatave me median, si dhe gjetja e mënyrave më të mira për përshtatjen me zhvillimet më të fundit në fushën e teknologjisë dhe të informacionit.

Zaçaj informoi edhe mbi disa prej instrumenteve të prezantuara rishtazi nga Gjykata Kushtetuese si Udhërrëfyesi (Guida) për Jurisprudencën e kësaj gjykate, me qëllim rritjen e cilësisë dhe konsolidimin e mëtejshëm të jurisprudencës, si dhe bërja publike e seancave gjyqësore dhe komunikimet për median, me qëllim rritjen e transparencës dhe informimin në kohë reale të publikut lidhur me veprimtarinë e gjykatës.

Burimi ATSH