Ministri i Drejtësisë, Besfort Lamallari, në ceremoninë e diplomimit të studentëve të Fakultetit të Drejtësisë të Universitetit të Tiranës, mbrëmjen e sotme, u bëri thirrje të rinjve që ta shohin diplomimin si fillimin e një rruge të re dhe të mbeten “studentë të jetës”, duke mësuar nga çdo vendim e përvojë.

Ai i inkurajoi të mos kenë frikë të marrin iniciativa, duke theksuar se “momenti perfekt” nuk vjen kurrë, nëse thjesht rrinë dhe presin, dhe se ndërgjegjja do të jetë gjykatësi më i mirë për secilin prej tyre nëse qëndrojnë besnikë ndaj vlerave dhe bindjeve.

Lamallari u ndal edhe tek Reforma në Drejtësi, duke kujtuar se Shqipëria ka ndërmarrë reformën më ambicioze në këtë fushë, si shprehje e vullnetit të popullit shqiptar.

Ai tha se vendi është më pranë se kurrë BE-së, por mbetet nevoja për përmirësime dhe konsolidim të institucioneve.

Ministri theksoi se në prioritetet e tij përfshihen plotësimi i paketës së reformës në drejtësi, përmirësimi i infrastrukturës së gjykatave dhe prokurorive, modernizimi i kodit penal e civil dhe rritja e standardeve të trajtimit të shtresave më vulnerabël të shoqërisë.

“Shqipëria ka kryer një nga reformat më ambicioze, jo vetëm në rajon, por edhe më gjerë, Reformën në Drejtësi, si shprehje e vullnetit absolut të popullit shqiptar. Sot Shqipëria nuk është ajo e 16 viteve më parë. Ka hapësira për përmirësim e ndryshime, por nuk ka qenë kurrë kaq pranë BE. Në prioritetet e programit qeverisës dhe Ministrisë së Drejtësisë është plotësimi i paketës së Reformës në Drejtësi, konsolidimi i institucioneve, përmirësimi i infrastrukturës së gjykatave dhe prokurorive, si dhe zhvillimi i kodeve të reja, atij penal, civil dhe të procedurave, në mënyrë që të krijohet një legjislacion i integruar dhe funksional”, tha Lamallari.

Duke theksuar se “punët e mira bëhen në ekip”, Lamallari i ftoi të diplomuarit t’i bashkohen Ministrisë së Drejtësisë dhe sistemit gjyqësor për t’i shërbyer vendit dhe brezave që vijnë me integritet, profesionalizëm dhe përkushtim.

Burimi ATSH