Një ekip me përfaqësues të Rojes Bregdetare të Shteteve të Bashkuara të Amerikës vizituan ditët e fundit portin e Shëngjinit, portin më të madh të hidrokarbureve, MBM Port në Porto Romano dhe PIA Port.

Gjatë vizitave të tyre ata u shoqëruan nga struktura përgjegjëse për sigurinë në anije dhe porte pranë Drejtorisë Përgjithshme Detare, në bashkëpunim me Ministrinë e Infrastrukturës dhe Energjisë.

Administratorët e porteve, oficerët e sigurisë dhe të tjerë të autorizuar për ndjekjen, zbatimin, kontrollin, monitorimin dhe raportimin e aktiviteteve që lidhen me sigurinë e jetës së përdoruesve të portit, ekuipazheve të anijeve, infrastrukturës portuale, mjedisit portual tokësor e ujor, mallrave dhe ngarkesave, sistemeve të menaxhimit, etj, njohën ekipin me rezultate, vështirësi, politika, objektiva dhe procese në ndjekje për përmirësim të performancës në ruajtjen dhe mbajtjen e standarteve të sigurisë në përputhje me Kodin ISPS dhe aktet ligjore e nënligjore në fuqi.

Sipas Drejtorisë së Përgjithshme Detare, vlerësimi i arritjeve dhe standardeve, veçanërisht për portet MBM dhe PIA, sugjerimet dhe rekomandimet për përmirësime të mëtejshme, do të shërbejnë si një motivim dhe angazhim për një programim ndryshe të masave.

Këto masa do të jenë në funksion të përgjigjes ndaj sfidave me të cilat përballen të gjithë aktorët me përgjegjësi në fushën e sigurisë në të gjitha anijet me flamur shqiptar dhe të gjitha portet e Shqipërisë.

Burimi ATSH