Presidenti i Republikës, Bajram Begaj ndodhet në Shtetet e Bashkuara të Amerikës si kryesues i delegacionit shqiptar në punimet e Javës së Nivelit të Lartë të Sesionit të 80-të të Asamblesë së Përgjithshme të OKB-së, që zhvillohet në Nju-Jork në datat 22-27 shtator 2025.

Në selinë e OKB-së, Begaj zhvilloi edhe një takim me presidentin e Francës, Emmanuel Macron.

Begaj e cilësoi Macron si një mik të mirë të Shqipërisë.

Kreu i Shtetit u shpreh se ky takim ishte në kuadër të Marrëveshjes mbi Diversitetin Biologjik Detar të Zonave Përtej Juridiksionit Kombëtar (BBNJ-së).

Begaj theksoi se, Shqipëria i është bashkuar kësaj nisme, duke bërë të mundur hyrjen në fuqi të saj.

“Është kënaqësi të takohem me Presidentin e Francës, Emmanuel Macron, një mik i mirë i Shqipërisë. Këtë herë takimi ynë ishte në kuadër të Marrëveshjes së BBNJ-së. Shqipëria i është bashkuar kësaj nisme, duke bërë të mundur hyrjen në fuqi të saj”, shkroi Begaj në një postim në rrjetet sociale..

Gjithashtu, gjatë Javës së Nivelit të Lartë të Asamblesë së Përgjithshme të OKB-së, Begaj u takua edhe me presidentin e Uzbekistanit, Shavkat Mirziyoyev.

Në takim u diskutua për avancimin e marrëdhënieve dypalëshe, me fokus në ekonomi dhe turizëm.

Gjithashtu u ra dakord për thellimin e bashkëpunimit në të gjitha nivelet.

Gjatë kësaj jave, Kreu i Shtetit do të mbajë fjalën e tij në Debatin e Përgjithshëm të Asamblesë së Përgjithshme, ku do të prezantojë qëndrimet e Shqipërisë mbi çështjet kryesore, përfshirë paqen dhe sigurinë ndërkombëtare, multilateralizmin, zhvillimin e qëndrueshëm dhe të drejtat e njeriut.

Agjenda e Presidentit Begaj përfshin edhe pjesëmarrjen në disa aktivitete të rëndësishme shumëpalëshe.

Kreu i Shtetit do të zhvillojë edhe takime dypalëshe me homologë të tij dhe përfaqësues të lartë të OKB-së.

Pjesë e agjendës së Presidentit Begaj do të jenë edhe takimet me përfaqësues të Diasporës shqiptare në Shtetet e Bashkuara të Amerikës dhe disa vizita në shkollat ku fëmijët e Diasporës mësojnë gjuhën amtare.

Burimi ATSH