Punimet në aksin rrugor Shirokë–Zogaj në Shkodër po vijojnë me intensitet. Ky aks konsiderohet një nga investimet strategjike që nxit turizmin dhe zhvillimin ekonomik të zonës, si dhe do të krijojë një lidhje të re mes Shqipërisë dhe Malit të Zi.

Kryeministri Edi Rama ndau mëngjesin e sotëm pamje nga kantieri i punës në segmentin Shirokë–Zogaj, ku vijon puna për zgjerimin e trasesë, vendosjen e kanalizimeve dhe elementë të tjerë infrastrukturorë.

Nëpërmjet një postimi në rrjetet sociale, Rama u shpreh se “ky është një investim infrastrukturor që hap rrugë të reja zhvillimi për Shkodrën”.

Ky projekt është pjesë e ndërhyrjeve për përmirësimin e infrastrukturës rrugore dhe lehtësimin e qarkullimit në zonat turistike të Shkodrës.

Rruga Shirokë–Zogaj është pjesë e mozaikut të investimeve në bregun perëndimor të liqenit të Shkodrës. Ky aks pritet të rrisë turizmin në zonë, krahas përmirësimit të aksesit në infrastrukturë për komunitetet lokale.

Aksi rrugor ka një gjatësi prej 6,5 kilometrash, nga të cilat 4,5 kilometrat e para janë zgjerim i rrugës ekzistuese buzë liqenit.

Segmenti Shirokë–Zogaj, së bashku me bajpasin në qendër të fshatit Zogaj, përbëjnë dy nyje të rëndësishme për lehtësimin e qarkullimit, duke e kthyer Zogajn në një korridor të rëndësishëm turistik dhe ekonomik me ndikim rajonal.

Burimi ATSH