Kryetarja e komanduar e bashkisë së Tiranës, Anuela Ristani, në fjalën e mbajtur në konferencën “Qeveritë vendore dhe reformat e decentralizimit”, theksoi rëndësinë e reformës territoriale të vitit 2015 dhe ndikimin e saj në zhvillimin e qeverisjes lokale dhe forcimin e buxhetit të kryeqytetit.

Ristani u shpreh se ndryshimet e shpejta që po ndodhin në Shqipëri janë të dukshme, duke e kthyer Tiranën në një qytet të njohur ndërkombëtarisht.

“Reforma territoriale e vitit 2015 ishte një ndryshim rrënjësor. Ajo e revolucionarizoi mënyrën se si njerëzit mendonin për qeverisjen lokale dhe i dha një formë dhe fuqizim asaj ideje që ishte thjesht në teori deri atëherë. Po të kishim 365 bashki, nuk mund të kishe vërtet mundësi për të bërë diçka në një vend me më pak se 3 milionë banorë. Tani Tirana mund të realizojë projekte të mëdha dhe të përmirësojë jetën e qytetarëve. Ky ndryshim është rezultat i decentralizimit, i cili na dha mundësinë të menaxhojmë më mirë shërbimet dhe të krijojmë burime të reja financiare”, tha ajo.

Ristani u shpreh se falë investimeve të bëra, Tirana është kthyer sot në një qytet të njohur ndërkombëtarisht.

“Tirana ka kaluar nga një qytet i panjohur në vitin 1995, në një destinacion të njohur ndërkombëtarisht. Kjo është diçka që nuk mund ta imagjinonim 30 vjet më parë. Por tani, mund të themi me krenari: Tiranën e njihni, po ju them që do të kaloni një fundjavë këtu dhe askush nuk do të bëjë fytyra të çuditshme”, tha Ristani.

Burimi ATSH