Ministri i Ekonomisë, Kulturës dhe Inovacionit, Blendi Gonxhja vizitoi Preshevën, ku mori pjesë në spektaklin kushtuar Nënë Terezës.

Ministri Gonxhja ndau në rrjete sociale momente ky event dhe shprehu kënaqësinë për këtë vizitë.

“Me shumë kënaqësi iu përgjigja ftesës së kryetares Sinani për spektaklin ‘Shën Tereza, shqiptarja e gjithë botës’, për misionaren shqiptare”, shkroi Gonxhja.

“E konsideroj një nder dhe përgjegjësi të veçantë të jem ndër të paktët përfaqësues të institucioneve shtetërore shqiptare që kanë vizituar Preshevën, një vend ku ndjenja e përkatësisë kombëtare është e gjallë dhe e palëkundur, dhe ku respekti për gjuhën dhe kulturën shqiptare ruhet me dashuri e përkushtim”, shtoi ai.

Spektakli për Nënë Terezën u vlerësua si një ngjarje që promovon vlerat humanitare dhe trashëgiminë e përbashkët kulturore.