Spitali i ri ditor në Qendrën Spitalore Universitare “Nënë Tereza”, ofron shërbim të specializuar për rreth 65 000 pacientë që kanë nevojë për shërbime si dializë, toksikologji, alergologji, dermatologji, reumatologji dhe hematologji.

Sipas QSUNT-së, në këtë spital ditor marrin trajtimin e nevojshëm në kushte moderne, me përkujdesje dhe profesionalizëm rreth 100 pacientë në ditë.

Këta pacientë ndiqen me terapi ditore të personalizuara, konsulta me mjekë specialistë dhe mbështetje e vazhdueshme shëndetësore, të gjitha në një ambient të dedikuar dhe komod.

Nga ana e tyre, pacientët shprehen të kënaqur për shërbimin që marrin dhe përkujdesjen e stafit mjekësor gjatë gjithë kohës.

“Ne jemi pacientë që vijmë një ditë po dhe një ditë jo këtu në shërbimin e dializës dhe jemi shumë të kënaqur”, shprehet një paciente.

Një tjetër thotë se ka rreth 21 vite që bën dializë, por infermierët dhe mjekët i kanë shërbyer në çdo kohë, pavarësisht problematikave dhe ecurisë së diagnozës.

“Spitali nuk ka asnjë mungesë medikamentesh. Nuk na mungon trajtimi nga ana e stafit mjekësor, të gjitha kryhen këtu dhe në kushte shumë të mira”, shprehet një tjetër qytetar.

Burimi ATSH