Tregu i punës për të rinjtë vijoi të shfaqë përmirësim gjatë tremujorit të dytë të vitit 2025.

Të dhënat më të fundit të publikuara nga Instituti i Statistikave (INSTAT) tregojnë një rritje të shkallës së punësimit për grupmoshën 15-29 vjeç, e cila është rritur me 0,9 pikë përqindje krahasuar me tremujorin e parë të vitit, dhe me 1,4 pikë përqindje në raport me tremujorin e fundit të vitit 2024.

Paralelisht, është shënuar edhe një ulje e konsiderueshme e shkallës së papunësisë për të njëjtën grupmoshë.

Aktualisht, papunësia te të rinjtë është në nivelin 17,9%, çka përfaqëson një ulje me 2,4 pikë përqindje krahasuar me tremujorin e parë të 2024-ës dhe me 1,3 pikë përqindje krahasuar me fundin e atij viti.

Një pjesë e madhe e të rinjve që nuk janë aktivë ekonomikisht, pra që nuk janë as në punë dhe as në kërkim aktiv të saj, deklarojnë se janë nxënës, studentë ose ndjekin forma të ndryshme trajnimi.

Konkretisht, 72,7 % e të rinjve ekonomikisht jo-aktivë i përkasin kësaj kategorie.

Ndërkohë, një përqindje shumë e vogël, vetëm 1,1 %, janë klasifikuar si të papunë të dekurajuar, të rinj që kanë hequr dorë nga kërkimi i një vendi pune për shkak të mungesës së besimit se do të gjejnë punësim.

Të dhënat pasqyrojnë një ecuri pozitive të tregut të punës për të rinjtë, e ndikuar nga dinamika të reja në ekonomi, politika nxitëse të punësimit dhe përfshirje më e lartë në programe edukimi dhe trajnimi profesional.

Burimi ATSH