Në Tiranë u mbajt mbledhja e Komitetit të Monitorimit të Instrumentit për Ndihmën e Para-Anëtarësimit (IPA), një takim i nivelit të lartë i bashkëkryesuar nga Koordinatori Kombëtar i IPA-së dhe përfaqësues të Komisionit Evropian.

Gjatë fjalës së saj përshëndetëse, Valentina Superti, drejtore për Ballkanin Perëndimor në Drejtorinë e Përgjithshme për Zgjerim dhe Fqinjësi Lindore, vlerësoi progresin e arritur deri tani.

Ajo theksoi se Bashkimi Evropian mbetet donatori më i madh në Shqipëri, me mbi 1,9 miliardë euro ndihmë financiare të dhënë përmes granteve të para-anëtarësimit që nga viti 2007.

Përveç kësaj, BE-ja ka mbështetur investime të përgjithshme prej 4,7 miliardë eurosh që nga viti 2008, ndërsa në vitin 2024 janë angazhuar 197 milionë euro fonde IPA për të ndihmuar Shqipërinë.

Koordinatore Kombëtare e IPA-së dhe drejtore e përgjithshme e Agjencisë, Eridana Çano nënvizoi se Instrumenti i Ndihmës për Para-Anëtarësim nuk është thjesht një mjet financimi, por një motor transformues që nxit ndryshime në mënyrën e qeverisjes, investimeve dhe zhvillimit shoqëror.

Ky instrument, sipas saj, ndihmon në përafrimin me acquis-në e BE-së, modernizimin e institucioneve, ndërtimin e infrastrukturës, zhvillimin e kapitalit njerëzor dhe promovimin e inovacionit në politikat publike, duke luajtur një rol vendimtar në rrugën drejt anëtarësimit të plotë në Bashkimin Evropian.

Ndërkaq, zëvendësministri i Financave, Andi Mehmeti, i cili është edhe Oficeri i ri Kombëtar Autorizues për fondet IPA, siguroi se Shqipëria është plotësisht e angazhuar në forcimin e kapaciteteve administrative dhe të sistemeve të kontrollit të brendshëm.

Ai përmendi zbatimin e një plani trajnimi për stafin e përfshirë në menaxhimin e fondeve të BE-së, si dhe strategjinë kombëtare kundër mashtrimit, në bashkëpunim të ngushtë me institucionet evropiane.

Burimi ATSH