Kryetarja e Kuvendit, Elisa Spiropali u takua sot në Prishtinë me Presidenten e Kosovës, Vjosa Osmani, ku theksoi mbështetjen e Shqipërisë për integrimin euro-atlantik të Kosovës, ndërsa nënvizoi edhe nevojën e heqjeve të sanksioneve të BE ndaj vendit fqinjë.

Zyra e shtypit e Kuvendit njofton se takimi u zhvillua gjatë qëndrimit në Prishtinë të Kryetares së Kuvendit, Spiropali, në kuadër të Forumit të 3-të Ndërkombëtar “Gratë, Paqja dhe Siguria”.

Kryetarja e Kuvendit, Spiropali dhe Presidentja Osmani diskutuan mbi përshpejtimin e integrimit europian dhe euro-atlantik dhe rritjen e rolit të Kosovës në marrëdhëniet ndërkombëtare.

“Prestigji i lartë i Shqipërisë është një rrethanë e favorshme për rritjen e mbështetjes së këtyre proceseve. Është koha për heqjen e sanksioneve ndaj Kosovës dhe inkurajimin e shtetit më të ri demokratik në Europë drejt anëtarësimit në NATO dhe Këshillin e Europës”, theksoi Spiropali gjatë takimit.

Sipas njoftimit për mediet nga zyra e shtypit e Kuvendit, Spiropali dhe Presidentja Osmani nënvizuan edhe rritjen e koordinimit për mbrojtjen e të drejtave dhe rritjen e rolit të faktorit shqiptar në rajon.

Burimi ATSH