Kryetari i Partisë Demokratike Sali Berisha zhvilloi sot takimin përmbyllës elektoral në qytetin e Durrësit.

Në fjalën e tij Berisha u fokusua te programi i PD-së, ku theksoi se qeveria e ardhshme në epiqendër të programit të saj do të ketë fëmijët dhe të rinjtë.

Berisha theksoi se “pakti kombëtar për rininë do të jetë udhërrëfyesi ynë për të rikthyer kombin në rininë e tij”.

“Programi ynë ka një zotim solemn, t’i kthejë kombit rininë e tij, të kthejë Durrësin dhe kombin në moshën e rinisë. Ndaj dhe jam këtu sot për të shpallur për mbarë të rinjtë shqiptarë se pakti kombëtar për rininë do të jetë udhërrëfyesi ynë për të rikthyer kombin në rininë e tij. Do të jetë pakti me të cilin të rinjtë shqiptarë do ndërtojnë në Durrës dhe në Shqipëri ëndrrën e tyre rinore, do jetë pakti me të cilin ne do rikthejmë të rinjtë shqiptarë nga mbarë bota”, tha Berisha.

Berisha premtoi se “do të dyfishohet investimi për arsimin, për rikthimin tek shkollat moderne, tek mësues që nuk do paguhen kurrë nën 1500 euro. Tek shkollat me teknologjitë më të larta. Hiqet mesatarja për universitetet”.

Berisha shtoi se “çdo i ri dhe e re që diplomohet, në kuadrin e paktit kombëtar për rininë, do ketë një vend pune të garantuar në sektor publik ose privat”.

“Në 100 ditët e para, krijohet fondi i rinisë, me të cilin ne do mbështesim me grante çdo të ri, 5 mijë euro grant për çdo të ri që nis biznes apo startup. Startup Albania do ketë fondin e veçantë. Çdo sipërmarrës që punëson të rinjtë do ketë 70 për qind zbritje në taksa. Për talentin e të rinjve në sport, kulturë, teknologji, një fond i veçantë për të mbështetur ata, fillimisht 5 milionë euro”, u shpreh Berisha.

Burimi ATSH