Kryetari i Partisë Demokratike Sali Berisha zhvilloi sot një takim me gratë në Tiranë.

Gjatë takimit Berisha kërkoi nga kandidatet gra që të zhvillojnë takime me qytetarët dhe të prezantojnë programin e PD-së.

“Është një optimizëm shumë i madh. Është një optimizëm po ta shprehim me terma reale, dy kate më i madh se ç’e mendojmë. Është një optimizëm që nuk mbahet mend kur ka ekzistuar. Unë konstatoj, nuk po flas vetëm për mitingjet, por për takimet që kam bërë në tregje, në rrugë, një klimë jashtëzakonisht miqësore”, tha Berisha.

“Ndaj dhe unë e kuptoj lodhjen, është faktor normal, por duhet të bëjmë gjithçka, të dalim mbi të dhe të shumëfishojmë takimet me qytetarët. Strukturat e PD të tëra duhet të jenë në funksion tuajin, në shërbimin tuaj. Duhet të bëjnë takime për ju dhe në emër tuaj”, shtoi Berisha.

Gjatë fjalës së tij Berisha premtoi faljen e çdo gjobe për qytetarët shqiptarë “që është vendosur para datës 11 maj e gjer në vitin 1992. Çdo gjobë, çdo kamatë zerohet, bëhet inekzistente për çdo gjë”.

“Duam t’i çlirojmë qytetarët shqiptarë nga makthet e padrejtësive që ata kanë përjetuar ndër vite. Këta sot e kësaj dite i mbledhin dhe dëgjoja një ditë një qytetar që thoshte se më duhen 80 vite punë për të paguar kamatat që kam për energjinë. Kështu që ne, jo vetëm qytetarëve, por ne do falim edhe gjobat e biznesit të vogël. Se edhe ai është viktimë e arbitraritetit dhe absurditetit të inspektorëve të qeverisë”, tha Berisha.

Berisha nënvizoi se “jemi shumë të vendosur që të falim çdo gjobë, ai kërkonte amnisti për grupet kriminale, ne do bëjmë amnisti për qytetarët dhe bizneset e ndershme”.

Burimi ATSH