Marrëveshja mes qeverisë shqiptare dhe Bankës Europiane të Investimeve (BEI) për hapjen e zyrës edhe në Tiranë është publikuar në Fletoren Zyrtare.

BEI synon që nëpërmjet hapjes së zyrës në Tiranë të forcojë praninë e saj në Shqipëri, duke nisur së pari, nga rritja e përfaqësimit të saj në Tiranë, në përpjekje për të diversifikuar edhe polet ekonomike e zhvillimore në Ballkanin Perëndimor, nisur kjo nga zhvillimet e vrullshme ekonomike në Shqipëri, perspektiva e zbatimit të Planit të Rritjes dhe nga rritja e kërkesës për burime financimi nga nivelet më të larta politike.

BEI ka investuar në Shqipëri deri më sot 458 milionë euro, në projekte që kanë të bëjnë me infrastrukturën, infrastrukturën ujore, energjinë, si dhe investime të tjera në sektorin e arsimit.

Po ashtu është edhe një nga kreditorët e rëndësishëm për projektet e rivitalizimit të sistemit hekurudhor në Shqipëri.

Vendosja e zyrës së Bankës Evropiane për Investim (BEI) ka një rol pozitiv për përshpejtimin e realizimit të objektivave që ka Shqipëria për anëtarësimin e saj në Bashkimin Evropian.

BEI është një nga institucionet përmes së cilit do të kalojnë një pjesë e paketave financiare, për të cilat Shqipëria mund të përfitojë.

Banka ofron edhe asistencë teknike dhe shërbime këshillimore për të ndihmuar përgatitjen, ekzekutimin dhe vlerësimin e projekteve.

Burimi ATSH