Drejtoresha e Përgjithshme e Agjencisë Shtetërore të Programimit Strategjik dhe Koordinimit të Ndihmës, Eridana Çano zhvilloi sot një takim pune me përfaqësues të Organizatës së Kombeve të Bashkuara për Zhvillim Industrial (UNIDO) në Shqipëri.

Gjatë këtij takimi, u theksua rëndësia e partneritetit midis Shqipërisë dhe UNIDO, me fokus në zbatimin e suksesshëm të Programit Vendor (CP) për zhvillimin e qëndrueshëm industrial (2020–2024).

Ky bashkëpunim është një hap tjetër për forcimin e prioritetit kombëtar të zhvillimit dhe promovimin e dokumentit të Partneritetit për Programin Vendor (PCP).

Programi PCP ofron një kornizë strategjike për shërbimet e integruara të UNIDO, duke u fokusuar në investime të mëdha dhe partneritete të drejtuara nga qeveria.

Qëllimi është të mobilizohen fonde shtesë për mbështetje të sektorëve prioritarë dhe zhvillim afatgjatë.

Në Shqipëri, ky program do të fokusohet te njerëzit, bizneset dhe mjedisi, duke mbështetur politikat industriale, zhvillimin e infrastrukturës dhe modernizimin e ekonomisë, ndërkohë që avancon përpjekjet për integrimin e Shqipërisë në BE.

Burimi ATSH