Zv/ministri për Evropën dhe Punët e Jashtme, Endrit Yzeiraj deklaroi sot se, Banka Evropiane e Investimeve do të hapë zyrë në Shqipëri.

Yzeiraj prezantoi projektligjin “Për ratifikimin e marrëveshjes, ndërmjet Republikës së Shqipërisë dhe Bankës Evropiane të Investimeve, lidhur me hapjen e përfaqësisë së Bankës Evropiane të Investimeve në Shqipëri” në Komisionin për Çështjet Europiane.

Yzeiraj u shpreh se, “në bazë të marrëveshjes kuadër të 1998-ës BEI ka investuar ose ka dhënë hua për Republikën e Shqipërisë deri tani thuajse 458 milionë euro të fokusuar në projekte të ndryshme të bazuar kryesisht në energji, transport dhe infrastrukturë ujore dhe është bërë së fundmi edhe një nga mbështetësit kryesorë të zhvillimit të rrjetit tonë hekurudhor”.

“Kjo marrëveshje”, shtoi ai, “i jep të drejtën për hapjen e zyrës së BEI-t, një zyrë fizike të BEI-t në Republikën e Shqipërisë, duke i dhënë stafit që do të punojë në këtë zyrë të njëjtat mbrojtje, të njëjtat kuadër të trupit diplomatik që sot i akordohen edhe pjesëtarëve së zyrës së delegacionit të Bashkimit Evropian në Tiranë”.

Ai theksoi se, kjo marrëveshje është një hap i jashtëzakonshëm në kuadër të procesit të integrimit.

“BEI dhe zyra e saj këtu do të jetë thellësisht e përfshirë edhe në menaxhimin e fondeve që lidhen me planin e ri të rritjes, për të ndjekur projektet, për të ndjekur plotësimin e afateve, kushteve të tyre dhe për të lehtësuar dhe për të krijuar kësisoj kushtet për thithjen e fondeve aq të nevojshme për Republikën e Shqipërisë”, tha Yzeiraj.

Zv.ministri u shpreh se, kjo marrëveshje është “një vulë e madhe besimi për procesin e integrimit ku Shqipëria tashmë është futur në mënyrë të vendosur dhe që synon ta përmbyllë në vitet në vijim”.

Yzeiraj u shpreh se, kjo marrëveshje nuk prek çështje të përafrimit me legjislacionin acqui të BE, por shtoi ai, “është një gur themeli i rëndësishëm në rrugëtimin drejt BE të Shqipërisë”.

Burimi ATSH