Kryetari i grupit parlamentar të Partisë Demokratike, Gazment Bardhi po zhvillon një vizitë në Uashington si pjesë e një delegacioni nga Kuvendi i Shqipërisë, së bashku me Sekretarin e Organizimit dhe Zgjedhjeve në Partinë Socialiste, Damian Gjiknuri dhe deputeten e PS-së, Blerina Gjylameti.

Ata zhvilluan një takim në Departamentin e Shtetit me zv.ndihmëssekretarin Amerikan të Shtetit dhe të dërguarin për Ballkanin Perëndimor Alexander “Sasha” Kasanof.

“SHBA mbetet aleati ynë kyç dhe shqiptarët janë me fat që i kanë patur gjithmonë në krah”, theksoi Bardhi në një postim në rrjetet sociale.

“Shqipëria si vend anëtar i NATO-s, duhet t’i qëndrojë standardeve të një vendi demokratik, duke nisur me garancitë për zgjedhje të lira dhe të ndershme, si dhe të punojë me vendosmëri për t’u bërë pjesë e BE”, nënvizoi kreu i grupit parlamentar demokrat.