Në Elbasan u nënshkrua sot memorandumi i mirëkuptimit mes Bashkisë Elbasan, Fondacionit Shqiptaro-Amerikan për Zhvillim (AADF), Ministrisë së Ekonomisë, Kulturës dhe Inovacionit (MEKI) dhe Ministrisë së Shtetit për Pushtetin Vendor (MSHPV) për rikualifikimin e lagjes “Kala” të qytetit, një zonë me vlera të pasura kulturore, historike dhe me potencial të madh për zhvillimin ekonomik dhe turistik të Elbasanit.

Rikualifikimi i lagjes “Kala: është vlerësuar si një ndërhyrje me interes publik dhe një mundësi e shkëlqyer për rritjen e turizmit dhe zhvillimin e bizneseve lokale.

Ky projekt ka për qëllim ruajtjen e trashëgimisë kulturore të qytetit dhe përmirësimin e kushteve të jetesës për banorët dhe bizneset në zonë.

Memorandumi i mirëkuptimit u firmos nga, kryetari i Bashkisë Elbasan, Gledian Llatja, bashkëdrejtorët ekzekutivë të AADF-së, Aleksandër Sarapuli dhe Martin Mata, ministri i Ekonomisë, Kulturës dhe Inovacionit, Blendi Gonxhja, si edhe ministri i Shtetit për Pushtetin Vendor, Arbjan Mazniku,

Në ceremoninë e nënshkrimit të memorandumit për rijetëzimin e kalasë së qytetit në Elbasan, ishte i pranishëm dhe kryeministri Edi Rama.

Kryetari i bashkisë Elbasan, Gledian Llatja, theksoi rëndësinë e këtij projekti për qytetin, duke e konsideruar si një mundësi të shkëlqyer për zhvillimin e Elbasanit si një destinacion turistik të rëndësishëm.

Ai u shpreh se ky projekt do të sjellë përfitime të mëdha për komunitetin dhe do të krijojë mundësi të reja pune dhe zhvillimi ekonomik.

Fondacioni Shqiptaro-Amerikan për Zhvillim (AADF) do të kontribuojë me mbështetje financiare dhe përvojën e tij të pasur në realizimin e projekteve të ngjashme në qytete të tjera të Shqipërisë si Shkodra, Korça, Berat, Kruja, Gjirokastra dhe Vlora.

Ky angazhim do të sigurojë një plan të mirëfilltë dhe një ndërhyrje të suksesshme për revitalizimin e lagjes “Kala”.

Projektet e rijetëzimit të qendrave të qyteteve të zbatuara nga AADF kanë pasur një ndikim të dukshëm në zhvillimin e biznesit dhe turizmit në disa qytete të Shqipërisë.

Disa nga rezultatet e suksesshme të projekteve të realizuara përfshijnë mbështetje për më shumë se 1050 biznese, rritje të vizitave turistike me mbi 110% dhe një vlerë të shtuar prej 120 milionë dollarë në zonat e zhvilluara.

Objektivat kryesore të projektit përfshijnë, rikualifikimin e lagjes “Kala” të Elbasanit dhe ruajtjen e trashëgimisë kulturore, përmirësimin e administratës dhe angazhimin e bizneseve dhe banorëve të zonës. Po ashtu, promovimin e Elbasanit si destinacion turistik dhe ofrimin e mundësive për sipërmarrësit lokalë.

Faza e parë e projektit do të përfshijë analizën e të dhënave dhe përgatitjen e një koncepti zhvillimi, si dhe të një projekti teknik për dy zona kryesore të lagjes “Kala”.

Ky projekt përfaqëson një hap të rëndësishëm në zhvillimin e qytetit dhe përmirësimin e kushteve të jetesës për banorët e lagjes “Kala”, duke ofruar mundësi të reja për të gjithë ata që kontribuojnë në zhvillimin ekonomik të zonës.

Burimi ATSH