Ministri i Mbrojtjes, Pirro Vengu prezantoi sot në Komisionin për Sigurinë Kombëtare projektligjin “Për organizimin dhe funksionimin e forcës rezerviste”.

Ky projektligj synon kompletimin e strukturës së shërbimit ushtarak në rezervë të Forcave të Armatosura të Republikës së Shqipërisë, theksoi ministri.

Ai shtoi se, nëpërmjet kësaj nisme, Qeveria Shqiptare garanton rritjen e gatishmërisë dhe kapaciteteve të mobilizueshme duke bërë një hap të madh përpara drejt forcimit dhe konsolidimit të Forcave të Armatosura dhe Mbrojtjes Civile.

“Në të njëjtën linjë me vendet aleate, të cilat prej kohësh po studiojnë modele për krijimin e mundësive të reja për rekrutim, sot Shqipëria aplikon një qasje të re duke synuar rritjen e numrit të komponentit rezervist deri në 2️0% të forcës aktive”” tha ndër të tjera Vengu.

Ministri theksoi se, “projektligji na jep instrumentet për të pasur një forcë rezerviste tërheqëse për ata, në Shqipëri dhe Diasporë, që dëshirojnë të kontribuojnë në sigurinë e vendit”.

Ministri falënderoi deputetët e pranishëm në komisionet përkatëse për mbështetjen që i kanë dhënë këtij projektligji.

“Jam i bindur se aplikimi i tij do të mundësojë ngritjen e një trupe rezerviste bashkëkohore, në përputhje me kërkesat e Organizatës së Traktatit të Atlantikut të Veriut (NATO)”, tha Vengu.

Burimi ATSH