Ministria e Bujqësisë dhe Zhvillimit Rural, (MBZHR) në bashkëpunim me Ambasadën e Shqipërisë në Mal të Zi, mori pjesë në Panairin e Përvitshëm Ndërkombëtar Diplomatik të Bamirësisë.

MBZHR bën të ditur se, në këtë aktivitet ndërkombëtar, produktet shqiptare tërhoqën vëmendje dhe interes të madh në vendin fqinj.

Kompanitë shqiptare që operojnë në fushën e bimëve mjekësore, prodhimit të verës, mjaltit, reçelnave, etj, prezantuan produktet e tyre nën logon “Made in Albania”, me shije unike dhe çmime konkurruese në treg.

Ambasadorja shqiptare në Mal të Zi, Zhaklina Peto vlerësoi pjesëmarrjen e produkteve shqiptare në panair, duke e cilësuar si një mundësi të shkëlqyer për promovimin e produkteve shqiptare jashtë territorit.

Peto tha se, “ky panair është një mundësi e mirë që ambasadorët të jenë sa më afër me sipërmarrësit dhe në të njëjtën kohë të promovojnë vendin e tyre me potencialet që përfaqësojnë dhe që është një mundësi shumë e mirë për zgjerimin e ndërveprimeve mes prodhuesve”.

(ATSH)