Ministri i Ekonomisë, Kulturës dhe Inovacionit, Blendi Gonxhja deklaroi sot se do të ketë një tjetër indeksim për pensionistët prillin e vitit që vjen, si dhe se bonusi i këtij viti do të jetë më i lartë se vitet e shkuara.

Në takimin me pensionistët e qarkut të Durrësit, ku i pranishëm ishte dhe kryeministri Edi Rama, ministri Gonxhja tha se kostoja e politikave të qeverisë në fushën e pensioneve për vitin 2025, llogariten 770 milionë euro në buxhet.

Ai e quajti një ndër sfidat më madhore rritjen e pensioneve, në kushtet kur, vuri në dukje Gonxhja, ka ardhur koha e trajtimit të të gjitha pasojave të tranzicionit të më shumë se 3 dekadave.

“Sfida duhet të trajtojë të gjitha pasojat nga keqqeverisja e viteve të tranzicionit, atë që kanë sjellë politikat dritëshkurtëra të shumë viteve para se PS të marrë drejtimin në 2013. Megjithëse duket si një retorike, duhet të punojmë sot për të metabolizuar një nga situatat më të vështira. Ka pasur një hedhje masive njerëzish në rrugë, mbyllje aktivitetesh të shumë ndërmarrjeve, kooperativave, emigracion të egër, papunësi të lartë. Të gjitha këto fenomene të tranzicionit të vështirë, ishim në prag lufte civile, piramidat, situata të rënda ekonomike, japin efektet sot. Këto ishin ndikuese direkte në ato vite edhe për politikat e qeverisë së atyre viteve që ndërtuan një skemë-kafaz të pensioneve, duke u vënë tavan deri në 24 mijë lekë, pavarësisht sa kishte kontribuar secili person”, tha ministri.

Sipas tij, këto “kurthe” bënë që qytetarët të merrnin pensione të ulëta.

Ministri foli dhe për reformën në fushën e pensioneve të 2014-ës, përmes së cilës, tha ai, u bë rritje e ndjeshme e pensioneve, mesatarisht 19 mijë lekë.

(ATSH)