Ministrja e Turizmit dhe Mjedisit, Mirela Kumbaro po merr pjesë në Ministerialin e Klimës, që po zhvillohet në Kopenhagë, Danimarkë, në 21-22 mars.

Kumbaro u ftua për të marrë pjesë në ministerial nga ministri për Klimën i Danimarkës, Dan Jorgensen.

Ministeriali u organizua nga Danimarka dhe Emiratet e Bashkuara Arabe, që pritën COP28 vitin e shkuar dhe Azerbajxhanit si organizator i COP29 në nëntor të këtij viti.

Në fokus të ministerialit është angazhimi i përbashkët me qëllim shndërrimin e politikave në vendime konkrete për klimën.

“Shqipëria nuk ndot, por vuan njësoj pasojat e ndryshimeve klimatike, teksa ulet e barabartë në tryezat e nivelit të lartë të diskutimit me modelin e saj të vogël, por kuptimplotë të mbrojtjes së biodiversitetit dhe prodhimit të energjisë së pastër”, shkruan Kumbaro në një postim në rrjetet sociale.

Për të tretin vit radhazi, Ministria e Klimës në Kopenhagë ka mbledhur rreth 40 liderë dhe ministra të klimës nga e gjithë bota për të përshpejtuar veprimet klimatike dhe për të mbrojtur rezultatet ambicioze në COP29. Ky ministerial ka si objektiv të vendosë një trajektore të qartë për COP29, e planifikuar të zhvillohet në Baku, Azerbajxhan në nëntor 2024.

(Marrë nga ATSH)