Kreu i Komunitetit Mysliman të Shqiptarëve, Bujar Spahiu, ka qenë pjesë e disa delegacioneve të përzgjedhura për të vizituar Mekën dhe për të hyrë brenda Xhamisë së shenjtë të Qabesë.

Spahiu ndodhet në Arabinë Saudite me ftesë të ministrit të Haxhit, Tevfik Rebiah, në Konferencën dhe panairin për shërbimet e Haxhit dhe Umres, i cili po mbahet në Xhide të Arabisë Saudite.

Ja çfarë shkruan ai për këtë vizitë të rrallë:

Teksa hyja mbrëmjen e djeshme në Qaben e bekuar, si kryesues i delegacionit shqiptar, më erdhi ndërmend një bisedë mes dy sahabive të mëdhjenj (Hz. Omerit dhe Hz. Aliut) të cilët ndërsa ishin në radhë duke hyrë në Qabe ‘përshëndesnin” edhe Gurin Zi;

Hz. Omeri teksa afrohet pranë Gurit të Zi thotë: “O gur, unë e di se ti je një gur që s’mund të sjellësh as dëm, as edhe dobi. Pra, kurrë nuk do të të kisha puthur sikur të mos kisha parë të Dërguarin e Allahut duke të puthur”. Thuhet se Hz. Aliu që i ndodhej pas, i pëshpërit: “O Omer! Po t’i dije enigmat që fshihen tek ai, nuk do të flisje kështu!”

Dhe sigurisht të drejtën e çdo gjëje Allahu e di më së miri!

Unë fala namaz nafile brenda Qabes dhe u luta për shumëçka, Allahu na i pastë pranuar!