Është ajo kohë e vitit kur ne jemi të bombarduar me lista se ku të udhëtojmë në 2024. Sigurisht, ne kemi idetë tona, por Booking.com sapo ka publikuar parashikimet vjetore të udhëtimeve për vitin e ri, bazuar në anketimin e 27 000 udhëtarëve në 33 vende të ndryshme!

Turistë të qyteteve të ndryshme dhe ekspertë vendas u morën në pyetje për të renditur destinacionet më të mira për argëtim, ushqim, kulturë dhe komunitet në 2024, shkruan në një artikull gazetarja Liv Kelly, të botuar në të përditshmen angleze “TimeOut”.

Parashikimet u bazuan në sjelljet e udhëtarëve, kërkesat e tyre për të udhëtuar dhe synuar destinacionet me klimë më të ngrohtë.

Agjencia më e madhe e udhëtimeve online, me qendër në Amsterdam e ka renditur Shqipërinë mes 10 destinacioneve më në trend për të vizituar në vitin 2024.

Hulumtimi i Booking.com parashikon se Vlora, një qytet bregdetar në Shqipëri, është destinacioni kryesor për të kaluar pushimet në vitin 2024.

E vendosur në një shtrirje më pak të njohur të Adriatikut, qyteti i Vlorës u ofron udhëtarëve një ndërthurje ideale të plazheve të bukura me qytetin e gjallë dhe historik.

Gjithashtu, vizitorët mund të shijojnë kuzhinën vendase me produktet e freskëta të detit.