Ministri i Financave dhe Ekonomisë, Ervin Mete ishte pjesë e delegacionit të kryesuar nga kryeministri Edi Rama, gjatë vizitës zyrtare të zhvilluar në Romë, Itali, në datat 26-27 shtator 2023.

Në takimet e zhvilluara me kryeministren e Italisë, Giorgia Meloni, zv/kryeministrin dhe ministrin e Punëve të Jashtme, Antonio Tajani, si edhe zyrtarë të tjerë të lartë u diskutua mbi marrëdhëniet mes dy vendeve dhe forcimin e mëtejshëm të bashkëpunimit ekonomik përmes projekteve konkrete.

Gjatë kësaj vizite u arrit në përfundimin se ka ende shumë potencial për të zgjeruar më shumë këtë bashkëpunimin mes Shqipërisë dhe Italisë, rritjen e shkëmbimeve tregtare dhe rritjen e prezencës së bizneseve italiane në vendin tonë.

Një vend të veçantë iu kushtua edhe diskutimeve mbi mundësitë që Shqipëria ofron për investitorët e huaj, përfshirë ata italianë, në sektorë prioritarë të ekonomisë si turizmi, bujqësia, energjia apo infrastruktura.

Në kuadër të vizitës u zhvillua edhe takimi i dytë i Komitetit të Përbashkët për Investimet, Çështjet Ekonomike dhe Sociale, Shqipëri-Itali, ku u theksua roli i Shqipërisë si një partner strategjik i Italisë në Ballkan, u ra dakord për të rritur bashkëpunimin përmes veprimeve konkrete në disa fusha ekonomike, si dhe u rikonfirmua mbështetja e shtetit fqinj për integrimin e vendit tonë në Bashkimin Europian.

Prezenca e investimeve italiane në Shqipëri ka pasur një trend rritës përgjatë viteve të fundit duke shënuar vlerën më të lartë përkatësisht 1.2 miliardë euro në vitin 2022. Italia ka një pozitë të konsoliduar në nivelin e investimeve të huaja direkte në Shqipëri, në terma të stokut dhe fluksit, duke u pozicionuar në 5 shtetet kryesore kontribuese për IHD-të.

Po ashtu, shkëmbimet tregtare me Italinë janë rritur gjatë viteve të fundit, duke arritur në afro 3.5 miliardë euro në vitin 2022.

Edhe numri i bizneseve italiane që operojnë në vendin tonë ka njohur rritje vit pas viti. Aktualisht, janë rreth 5669 biznese me të paktën një ortak me shtetësi italiane me status aktiv që operojnë në Shqipëri.

Italia përfaqëson një partner të privilegjuar ekonomik e tregtar për Shqipërinë, duke qenë një prej donatorëve kryesorë dypalësh, në mbështetje të zhvillimit shoqëror dhe ekonomik të vendit përmes financimit të një sërë programesh.

Marrë nga ATSH