Ministrja e Shtetit për Rininë dhe Fëmijët, Bora Muzhaqi, e pranishme në çeljen e panairit “Art dhe Zeje 2023”, theksoi se, programi është një rrugë frytdhënëse që rinia shqiptare t’i përkushtohet traditës dhe përmes saj të kultivojë talente.

“Bravo për fëmijët! Ne përpara 2 viteve, kur nisëm ta diskutonim këtë program për mënyrën se si qeveria mund të ndihmonte fëmijët të shpenzonin kohën në mënyrë frytdhënëse, i drejtuam sytë nga tradita, zejet, puna me tokën, nga fusha sportive”, tha Muzhaqi.

Ajo u shpreh se, u vendos që shkolla të ishte bërthama ku do të merrte jetë ky program, një ambienti më i sigurt për fëmijët.

“Pasi vendosëm që shkolla do të ishte bërthama kryesore ku zhvillohej ky program, arritëm që në janar të këtij viti të vinim në jetë këtë program në 200 shkolla. Kurset ofrohen në 200 shkolla në të gjithë qarqet në Shqipëri. Kanë bazën e nevojshme materiale për t’i mundësuar fëmijëve, pavarësisht mundësisë ekonomike për ti ndjekur këto kurse dhe që prindërit të jenë të qetë se janë në një ambient të sigurt siç është shkolla”, tha Muzhaqi.

Panairi i punimeve artizanale dhe artistike bëri bashkë mbi 500 nxënës, prindër dhe staf mësimor nga Zyrat Vendore të Arsimit Parauniversitar nga e gjithë Shqipëria.

Gjatë aktivitetit grupe të ndryshme muzikore, vallesh dhe baletit performuan këngë dhe valle të ndryshme.

Programi Kombëtar “Art, Zeje, Sport”, i quajtur ndryshe edhe si Programet Jashtë Orarit Mësimor (JOM) u zbatua gjatë këtij viti shkollor në sistemin arsimor parauniversitar në 200 Shkolla Qendër Komunitare të zgjedhura nga ZVAP-të dhe miratuara nga MAS, duke angazhuar 644 punonjës arsimorë dhe 10,423 nxënës, duke mbështetur këto shkolla me bazë materiale në ndihmë të veprimtarive krijuese.