Presidenti Bajram Begaj i shoqëruar nga Zonja e Parë, Armanda Begaj, morën pjesë në Londër në ceremonitë e kurorëzimit të mbretit Charles III dhe mbretëreshës së Mbretërisë së Bashkuar.

Presidenti Begaj u shpreh në Twitter i nderuar që përfaqësoi Shqipërinë në Kurorëzimin historik të mbretit Charles III dhe mbretëreshës Camilla.

“Duke çmuar lidhjen tonë të fortë me Mbretërinë e Bashkuar, iu dërgojmë urimet tona më të mira Madhërive”, shkroi Begaj.

Ditën e premte Presidenti Begaj dhe Zonja e Parë morën pjesë në pritjen e dhënë nga mbreti Charles III dhe mbretëresha e Mbretërisë së Bashkuar në Pallatin Buckingham për krerët e shteteve pjesëmarrës në ceremoni.

Ndërsa, sot ata ndoqën ceremonitë e kurorëzimit të mbretit dhe të mbretëreshës së Mbretërisë së Bashkuar në Kishën e Westminster.

Në kuadër të pjesëmarrjes në këto ceremoni, Presidenti Begaj u takua edhe me krerë të ndryshëm shtetesh.