Ministri i Brendshëm, Ervin Demo dhe zëvendëskryeministrja Albana Koçiu do të drejtojnë së bashku Partinë Socialiste në bashkinë e Tiranës, pas besimit të marrë sot nga Asambleja Kombëtare e kësaj force politike.

Në një reagim pas zgjedhjes, Demo falënderoi kryeministrin dhe kryetarin e Partisë Socialiste, Edi Rama, dhe anëtarët e Asamblesë Kombëtare për besimin, si dhe shprehu mirënjohje për socialistët për kontributin e tyre ndër vite.

Demo theksoi se së bashku me Koçiun, deputetët e bashkisë së Tiranës dhe strukturat e partisë do të angazhohen për organizimin dhe forcimin e PS-së në çdo lagje, njësi administrative dhe fshat të kryeqytetit.

Ai nënvizoi se puna do të mbështetet tek organizimi në ekip, përgjegjësia individuale dhe komunikimi i vazhdueshëm me qytetarët, duke ndjekur nga afër problematikat e tyre.

Sipas Demos, qytetarët e Tiranës presin shërbime publike më të mira, shkolla të sigurta për fëmijët dhe institucione që u përgjigjen shqetësimeve të tyre të përditshme.

“Përgjegjësia jonë është ndaj të gjithë qytetarëve të Tiranës, pavarësisht bindjeve të tyre politike”, u shpreh Demo, duke theksuar se besimi i marrë do të përkthehet në organizim, punë konkrete dhe rezultate për kryeqytetin.

Burimi ATSH