Ministria e Infrastrukturës dhe Energjisë do të financojë me 35,15 miliardë lekë zhvillimin e infrastrukturës rrugore në vitin 2027, me fokus projektet madhore dhe përmirësimin e lidhjeve infrastrukturore në vend.

Ministri i Infrastrukturës dhe Energjisë, Enea Karakaçi, përmes një videomesazhi, bëri të ditur se “ky është fondi që buxheti i akordon Ministrisë së Infrastrukturës dhe Energjisë për zhvillimin e rrugëve”.

Sipas ministrit, “dy projekte madhore, autostrada Tiranë–Durrës dhe aksi Tiranë–Ndroq–Plepa, do të financohen tërësisht nga buxheti i shtetit, duke krijuar kushtet për përshpejtimin e punimeve dhe përfundimin e tyre në një kohë sa më të shkurtër”.

“Ndërkohë, një tjetër vepër e rëndësishme, bajpasi i Elbasanit, kalon tashmë në një skemë të re financimi, përmes buxhetit të shtetit, duke i dhënë një perspektivë të re vijimit dhe realizimit të këtij projekti”, tha Karakaçi.

Ministri u ndal edhe te projektet e tjera infrastrukturore që do të marrin mbështetje financiare gjatë vitit 2027, duke theksuar rëndësinë e Korridorit VIII dhe Korridorit Blu.

“Korridori Blu po merr jetë përmes projekteve koncesionare, Kashar–Rrogozhinë, punimet e të cilit nisin në fund të këtij viti, Lekaj–Fier dhe Milot–Balldren, për të cilët jemi afër nënshkrimit të kontratës që i hap rrugën finalizimit të projektit të zbatimit dhe nisjes së punimeve”, u shpreh ai.

Karakaçi bëri të ditur se në buxhetin e vitit 2027 janë përfshirë edhe projekte të reja, si hyrja veriore e Tiranës, e cila anashkalon Kamzën, rruga Berat–Skrapar, si dhe hyrja verilindore e Tiranës, që lidh kryeqytetin me Rrugën e Arbrit.

“Ndërkohë, ARRSH po finalizon dhe po vijon punën për hartimin e projekteve të reja rrugore. Kemi në proces tri rrugë, për të cilat do të shqyrtohet mundësia e financimit: Koplik–Bogë–Theth, Rruga e Vjosës dhe lidhja Rrëshen–Mirditë”, deklaroi ministri.

Sipas tij, objektivi është ndërtimi i një infrastrukture rrugore moderne, më të sigurt dhe më të qëndrueshme, që përmirëson lidhjet mes qyteteve dhe rajoneve, si dhe forcon integrimin e Shqipërisë me rrjetet evropiane të transportit.

“Ky është një buxhet që nuk mbështet vetëm investimet e vitit 2027, por edhe vizionin dhe strategjinë tonë afatgjatë për zhvillimin e infrastrukturës rrugore në Shqipëri”, përfundoi Karakaçi.

Burimi ATSH