Ministrja e Arsimit, Mirela Kumbaro tha sot se në tetor, Tirana do të jetë mikpritëse e mbledhjes së Bordit të PISA-s, një prej takimeve më të rëndësishme ndërkombëtare për arsimin dhe vlerësimin e cilësisë së tij.

Kumbaro theksoi se “mbledhja e radhës e Bordit të PISA-s në kryeqytetin tonë, e vendos Shqipërinë në qendër të përvojave që diskutojnë dhe formësojnë të ardhmen e politikave arsimore ndërkombëtare, si moment që konfirmon angazhimin tonë për arsim cilësor dhe në koherencë me zhvillimet ndërkombëtare”.

Pas rezultateve të PISA 2025 ekipi i Ministrisë së Arsimit dhe Agjencia Kombëtare e Shërbimeve Arsimore po vijojnë punën për analizimin e plotë të raportit të PISA-s.

Kjo analizë ka qëllim kuptimin e rezultateve dhe nxjerrjen e përfundimeve të nevojshme, duke krahasuar rezultatet e Shqipërisë me ecurinë e saj ndër vite, me vendet e rajonit dhe me vende me realitete të ngjashme socio-kulturore e ekonomike, ndërsa do të merren në konsideratë edhe trendet globale.

PISA është një ndër instrumentet që ndihmon në vlerësimin dhe përmirësimin e sistemit arsimor, ndërsa në qendër të këtij procesi është nxënësi.

/Marrë nga ATSH