Berati vijon të jetë ndër destinacionet kryesore që vizitohet nga mijëra turistë në të gjitha stinët e vitit.

Kryeministri Edi Rama ndau sot në rrjetet sociale pamje nga kalaja e Beratit e mbushur me turistë në këto ditë të nxehta gushti.

Rreth 550 mijë vizitorë e kanë vizituar Beratin brenda pesë muajve të parë të vitit 2026, nga të cilët rreth 85% e të gjithë fluksit turistik janë të huaj.

Turistët vendas e të huaj e zgjedhin qytetin e “një mbi një dritareve”, jo vetëm për historinë e kulturën, por edhe për ushqimin e mikpritjen vendase.

Në qendër të interesit të tyre vijojnë të jenë kalaja e Beratit, lagjet historike Mangalem dhe Gorica, ura e Goricës dhe Muzeu Kombëtar i Ikonografisë “Onufri”.

Berati është pjesë e Listës së Trashëgimisë Botërore të UNESCO-s, ndërsa kombinimi i trashëgimisë historike, arkitekturës, gastronomisë dhe natyrës po e zgjeron ofertën turistike të qytetit.

Kalaja e Beratit mbetet një nga pikat kryesore të vizitës, ndërsa përtej qendrës historike turistët po orientohen edhe drejt zonave rurale, kantinave të verës dhe agroturizmit.

Oferta turistike përfshin gjithashtu eksplorimin e kanionit të Osumit, ujëvarën e Bogovës, hiking në zonën e Tomorit dhe ture të ndryshme kulturore e gastronomike.

Burimi ATSH